- ਬੀਤੀ ਸ਼ਾਮ ਲੋਧੀ ਕਲੱਬ ਵਿਖੇ ਕਰਵਾਇਆ ਗਿਆ ਸਮਾਰੋਹ
DMT : ਲੁਧਿਆਣਾ : (03 ਅਪ੍ਰੈਲ 2023) : – ਮੇਰੇ ਪਰਿਵਾਰ ਦਾ ਕਿਸਾਨ’ ਗਰੁੱਪ ਵਲੋਂ ਲੋਧੀ ਕਲੱਬ ਦੇ ਸਹਿਯੋਗ ਨਾਲ 6 ਕਿਸਾਨਾਂ ਦੇ ਜੈਵਿਕ ਉਤਪਾਦਾਂ ਦੀ ਪ੍ਰਦਰਸ਼ਨੀ ਅਤੇ ਭੋਜਨ ਨਾਲ ਚੰਗੀ ਸਿਹਤ ਦੇ ਸਬੰਧ ‘ਤੇ 3 ਡਾਕਟਰਾਂ ਅਤੇ ਮਾਹਿਰਾਂ ਦੁਆਰਾ ਵਰਕਸ਼ਾਪ ਦਾ ਆਯੋਜਨ ਕਰਕੇ ਵਿਸ਼ਵ ਸਿਹਤ ਦਿਵਸ ਮਨਾਇਆ ਗਿਆ.
ਸਮਾਗਮ ਦੀ ਪ੍ਰਧਾਨਗੀ ਡਿਪਟੀ ਕਮਿਸ਼ਨਰ ਲੁਧਿਆਣਾ ਸੁਰਭੀ ਮਲਿਕ ਆਈ.ਏ.ਐਸ. ਅਤੇ ਸਿਵਲ ਸਰਜਨ ਲੁਧਿਆਣਾ ਡਾ. ਹਿਤਿੰਦਰ ਕੌਰ ਵਲੋਂ ਕੀਤੀ ਗਈ.
‘ਮੇਰੇ ਪਰਿਵਾਰ ਦਾ ਕਿਸਾਨ’ ਇੱਕ ਕਮਿਊਨਿਟੀ ਫਾਰਮਿੰਗ ਗਰੁੱਪ ਹੈ ਜਿਸ ਨੂੰ ਪੰਜਾਬ ਵਿਧਾਨ ਸਭਾ ਵਿੱਚ ਜੈਵਿਕ ਖੇਤੀ ਨੂੰ ਉਤਸ਼ਾਹਿਤ ਕਰਨ ਲਈ ਆਪਣੀ ਸਫਲਤਾ ਲਈ ਸਨਮਾਨਿਤ ਕੀਤਾ ਗਿਆ ਹੈ। ਮਨੀਤ ਦੀਵਾਨ ਨੇ ਦੱਸਿਆ ਕਿ ”ਅਸੀਂ ਆਪਣੇ ਮੈਂਬਰਾਂ ਲਈ ਸਬਜ਼ੀਆਂ ਉਗਾਉਂਦੇ ਹਾਂ ਅਤੇ ਸਬਜ਼ੀਆਂ ਨੂੰ ਘਰੋ-ਘਰ ਪਹੁੰਚਾਉਣ ਲਈ ਆਪਣੀ ਡਿਲੀਵਰੀ ਪ੍ਰਣਾਲੀ ਵਿਕਸਿਤ ਕੀਤੀ ਹੈ।”
ਮੇਰੇ ਪਰਿਵਾਰ ਦਾ ਕਿਸਾਨ ਗਰੁੱਪ ਦੇ ਇੱਕ ਹੋਰ ਮੈਂਬਰ ਰੋਹਿਤ ਗੁਪਤਾ ਨੇ ਦੱਸਿਆ ਕਿ ਗਰੁੱਪ ਦੀ ਸਲਾਨਾ ਮੈਂਬਰਸ਼ਿਪ ਫੀਸ 36,000 ਰੁਪਏ ਹੈ ਜੋ ਕਿ ਖੇਤੀ ਅਤੇ ਸਪੁਰਦਗੀ ਦੇ ਸਾਰੇ ਖਰਚਿਆਂ ਨੂੰ ਕਵਰ ਕਰਦੀ ਹੈ ਜਿਸ ਵਿੱਚ ਹਰੇਕ ਮੈਂਬਰ ਨੂੰ ਲਗਭਗ 300-350 ਕਿਲੋਗ੍ਰਾਮ ਸਬਜ਼ੀਆਂ ਸਲਾਨਾ ਸਿੱਧੇ ਉਹਨਾਂ ਦੇ ਘਰ-ਘਰ ਪਹੁੰਚਾਈਆਂ ਜਾਂਦੀਆਂ ਹਨ।
ਅੰਮ੍ਰਿਤਾ ਮਾਂਗਟ ਨੇ ਕਿਹਾ ਕਿ ਅਸੀਂ ਕਿਸਾਨਾਂ ਨੂੰ ਆਰਗੈਨਿਕ ਕਣਕ, ਚਾਵਲ, ਦਾਲਾਂ, ਜੜੀ-ਬੂਟੀਆਂ ਆਦਿ ਉਗਾਉਣ ਲਈ ਸਲਾਹ ਦਿੰਦੇ ਹਾਂ ਅਤੇ ਉਹਨਾਂ ਲਈ ਆਰਡਰ ਅਤੇ ਡਿਲੀਵਰੀ ਦੀ ਸਹੂਲਤ ਦਿੰਦੇ ਹਾਂ।
ਡਾ. ਨਵੀਨ ਪਿਰਾਰਾ ਰੇਡੀਓਲੋਜਿਸਟ ਵਲੋਂ ਨਵਜੰਮੇ ਬੱਚਿਆਂ ਵਿੱਚ ਕੀਟਨਾਸ਼ਕਾਂ ਦੇ ਪ੍ਰਭਾਵ ਬਾਰੇ ਜਾਣਕਾਰੀ ਦਿੱਤੀ, ਡਾ. ਗੌਹਰ ਵਾਤਸਾਯਾਨ ਅਤੇ ਆਯੁਰਵੇਦ ਡਾਕਟਰ ਵਲੋਂ ਮੌਸਮੀ ਅਤੇ ਕੁਦਰਤੀ ਸਬਜ਼ੀਆਂ ਦੀ ਸਾਰਥਕਤਾ ਬਾਰੇ ਚਰਚਾ ਕੀਤੀ ਜੋ ਸਾਡੇ ਸਰੀਰ ਅਤੇ ਮੌਸਮ ਦੀਆਂ ਲੋੜਾਂ ਅਨੁਸਾਰ ਉਗਦੀਆਂ ਹਨ। ਸਿਮਰਤ ਕਥੂਰੀਆ ਡਾਈਟੀਸ਼ੀਅਨ ਨੇ ਦੱਸਿਆ ਕਿ ਸਾਡੇ ਸਰੀਰ ਨੂੰ ਸਾਰੇ ਲੋੜੀਂਦੇ ਪੌਸ਼ਟਿਕ ਤੱਤ ਪ੍ਰਦਾਨ ਕਰਨ ਲਈ ਅਸਲ ਵਿੱਚ ਕੁਦਰਤੀ ਸਬਜ਼ੀਆਂ ਦਾ ਕੋਈ ਬਦਲ ਨਹੀਂ ਹੈ ਅਤੇ ਡਾ. ਜਸ ਕੋਹਲੀ ਨੇ ਸਾਡੇ ਸਰੀਰ ਨੂੰ ਪ੍ਰਭਾਵਿਤ ਕਰਨ ਵਾਲੀਆਂ ਖੁਰਾਕਾਂ ਵਿੱਚ ਪੋਸ਼ਣ ਦੇ ਤਕਨੀਕੀ ਪਹਿਲੂਆਂ ਬਾਰੇ ਚਾਨਣਾ ਪਾਇਆ।
ਜੈਵਿਕ ਕਿਸਾਨਾਂ ਵਿੱਚ ਗੰਗਾਨਗਰ ਤੋਂ ਸੁਰਿੰਦਰ ਸਿੰਘ, ਫਾਜ਼ਿਲਕਾ ਤੋਂ ਨਵਰੂਪ ਸਿੰਘ, ਪੱਖੋਵਾਲ ਤੋਂ ਰੁਪਿੰਦਰ ਕੌਰ ਵਲੋਂ ਆਪਣੇ ਉਤਪਾਦ ਪ੍ਰਦਰਸ਼ਿਤ ਕੀਤੇ ਜਿਨ੍ਹਾਂ ਨੂੰ ਭਰਵਾਂ ਹੁੰਗਾਰਾ ਮਿਲਿਆ। ਘਰੇਲੂ ਸ਼ੈੱਫ ਰੂਹ ਚੌਧਰੀ ਅਤੇ ਟੀਨਾ ਗੁਪਤਾ ਨੇ ਘਰ ਦੇ ਬਣੇ ਬਾਜਰੇ ਦੇ ਲੱਡੂ ਅਤੇ ਰੋਟੀਆਂ ਪ੍ਰਦਰਸ਼ਿਤ ਕੀਤੀਆਂ।
ਸੀ.ਏ. ਨਿਤਿਨ ਮਹਾਜਨ ਵਲੋਂ ਇਸ ਪਹਿਲਕਦਮੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦਾ ਕਲੱਬ ਹਮੇਸ਼ਾ ਉਨ੍ਹਾਂ ਪਹਿਲਕਦਮੀਆਂ ਦਾ ਸੁਆਗਤ ਕਰਦਾ ਹੈ ਜੋ ਉਨ੍ਹਾਂ ਦੇ ਮੈਂਬਰਾਂ ਨੂੰ ਕਿਸੇ ਵੀ ਤਰ੍ਹਾਂ ਲਾਭ ਪਹੁੰਚਾਉਂਦੇ ਹਨ। ਕਾਰਜਕਾਰੀ ਮਹਿਲਾ ਰੀਤੂ ਚੰਦਨਾ ਨੇ ਕਿਹਾ ਕਿ ਕਲੱਬ ਕੇਵਲ ਮਨੋਰੰਜਨ ਅਤੇ ਖਾਣ ਪੀਣ ਦਾ ਸਥਾਨ ਹੀ ਨਹੀਂ ਹਨ ਬਲਕਿ ਅਜਿਹੇ ਸਮਾਗਮ ਮੈਂਬਰਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਲਈ ਬਹੁਤ ਲਾਹੇਵੰਦ ਹਨ।
